明苑粉麵茶餐廳 (已結業)

同朋友去信和買Game所以係附近揾食。坐低叫咗一個土魷肉餅，一個鹹蛋肉餅煲仔飯。土魷肉餅飯先嚟，飯太濕，但夥計好快手收咗個煲蓋，我想落D豉油再焗一焗都唔得。肉餅肉質幾好，加埋土魷幾香及彈牙。豉油調味淡淡地唔錯。食到後半煲時D飯先乾返D，冇乜飯焦，但冇所謂反正我唔太鍾意食飯焦。鹹蛋肉餅煲仔飯...攞走煲蓋後只見到肉餅同兩條菜而見唔到我哋Expect嘅金黃色鹹蛋黃。揾咗一陣終於係塊肉餅正正下便揾到隻鹹蛋...竟然係原隻連殼嘅何必呢? 咁個肉餅同D飯咪冇鹹蛋味攞?! 不如鹹蛋另上吖笨~有時叫肉餅飯嘅其中一個好處係唔使問煩吖嘛，冇骨又方便。依家張檯已經窄重要咁大工程去開隻鹹蛋，個煲又熱又冇位借力，完全冇理熟客感受。一打開隻鹹蛋重要未熟哂嘅...同樣飯太濕，味道正常，但開完隻鹹蛋已經有D心力交瘁，最後食咗一半就冇食喇。