蓮花新派健康料理 (已結業)

元朗出名美食多，估唔到素食都好好食！三個人，叫咗個四人餐，四餸一湯。首先嚟嘅係呢一個仿翅，估唔到同平時食到嘅差唔多，有驚喜。然後呢一個係佢哋自家製嘅玉子豆腐，上面有啲菇菌，下面就係佢哋嘅玉子豆腐，蛋味十足。美中不足嘅係，小棠菜有少少青味。呢一個係蜜汁叉燒，呢個真係好好食咬落香甜，用嚟送飯簡直一流，不過屋企人覺得甜咗啲，我就覺得雖然甜，但係都接受到。最後一道仿肉嘅係辣子雞，個人來講覺得唔算太辣，不過小朋友未必食到。正正經經炒番個菜，估唔到都幾有鑊氣。三個人食，可能因為係素食，所以我哋食得落。（真係食到好飽好飽好飽）總結呢一餐，其實都幾滿足到我嘅「肉望」，突破左我對食素嘅古板印象。而家一路打食評，一路回味返佢嘅味道，都好想再去多次，希望嚟緊再有機會去食。 服務方面，樓面好似得一兩個姨姨，不過都唔會無人理你。一坐低佢就會同你介紹吓啲嘢食，食到一半都會關心你嘅需要，好有屋企食飯嘅感覺。