茶木‧台式休閒餐廳 (已結業)

好耐冇食過茶木，今日行過銅鑼灣就去左食，知道呢邊有兩間，就揀左世貿中心，近啲嘅黎食。入到去個位有海景，唔知係咪太耐冇食，menu多左好多新菜色。我地叫左微辣手工拌麵、沙嗲玉藕帶骨牛小排、海鹽珍珠奶蓋岩漿蛋糕、草莓櫻姫同柚子咖啡。手工拌麵細心食落有少少似麻辣火鍋嘅麻辣味，但唔算好辣，麵都煮得岩岩好，唔會太軟同硬，而且仲有牛肉、鴨血同豆腐都唔錯。沙嗲玉藕帶骨牛小排真係好推薦，啲牛整得好好食，又有肉汁係入面。海鹽珍珠奶蓋岩漿蛋糕切落去會有珍珠係入面流出，上面仲有個雪糕筒，入面有朱古力雪糕，蛋糕鋪滿海鹽同奶蓋，所以係咸嘅蛋糕，感覺好特別同埋食完之後都好飽。草莓櫻姫同柚子咖啡個人比較中意草莓櫻姫，甜甜地又好重草莓味，唔會太假。柚子咖啡就應該中意飲苦咖啡嘅人比較岩飲，少少苦同柚子嘅味道融合埋一齊又係另一種感覺。