靚煲皇 (已結業)

早排父親節，當然要同父親去食餐好既。前排有朋友食過呢間靚煲皇話唔錯，介紹我黎識下d小菜，唔講唔知原來呢間專食打邊爐有小菜食。紅燒乳鴿：真係唔可以唔讚下呢到個乳鴿，賣相細細隻，但係好多肉，d肉質仲要好嫩好滑，外皮脆卜卜，擺上台熱辣辣之餘仲要唔多油，而且d淮鹽係佢地自己整既，好有心機。老闆話整乳鴿個師傅以前係沙田雍雅山房到做嫁，我就唔識喇，但父親個表情就好欣賞。椰香雞：呢個椰香雞好香椰汁味，但食落d汁又唔會好杰，d雞好大件，可能係岩岩食完個乳鴿，相比之下呢個雞d肉質就比較老，但其實已經好唔錯，只係個乳鴿太好食。馬來胡椒蝦：呢個蝦未擺上台，姐姐行緊埋黎已經聞到好香胡椒味，擺上台已經見到碟邊好多朝椒粒，開頭仲怕會好辣，點知食落唔算好辣，仲好香胡椒味，蝦既肉質都彈牙而且鮮甜，食得出係新鮮蝦黎既。唔試過真係唔知呢間打邊爐原來有小菜，而且質素咁好，不過老闆話小菜係季節性，只係做到11月咋。同埋我見到隔離店有冰震木瓜甜品，已經決定下次再去試下喇。