茶木‧台式休閒餐廳 (PopCorn 1)

琴日剛去完旅行返黎，今日婆婆就急住搵隻孫。咁就順便一齊食個下午茶同去行下街啦。食下午茶係因為我地都瞓到好晏呢。一心諗住去茶木食下午茶，因為記得上次去食個下午茶好抵架嘛，比淨叫一碗麵平，重要連飲品，但份量又唔係細好多。點知今日去到話冇下午茶喎我問左兩句點解冇左既？我老公就嫌麻煩，話冇所謂啦，可能係我記錯，或者假日本來就係冇下午茶呢。我心諗我有所謂喎，有下午茶同冇下午茶個價差好遠架嘛。冇下午茶我可以去第二間食。真係未食就已經谷住谷住。食食下，我見另一枱都有人問，點解冇左下午茶，即係唔係我問題。

牛肉麵

仔同老公都係叫牛肉麵，一如以往係好味的。最鍾意個湯。

鹽酥雞麵

我既例牌，鹽酥雞麵，佢地既鹽酥雞真心好味，切起既大細亦都岩岩好易入口，另外個湯，真係好好味。一向食麵，拉麵，車仔麵，牛腩麵果D我都唔會飲個湯的，係茶木個湯，我每次都會飲。

珍珠奶茶

因為冇包飲品，只係叫左杯珍珠奶茶同老公Share飲。

甜品

婆婆點的士多啤梨多士，因為婆婆食左lunch先出黎呢，所以佢就叫個甜品，等我地食完麵一齊食啦。講真，茶木既多士靚就真係好靚，影相打卡係一流。不過口感同味度呢，我就麻麻地欣賞啦。硬過石頭，咬完口都痛，味就普通雪糕果D囉。