阿久根和牛立燒店 (已結業)

等咗幾年仲未通關，爆哂假都唔知點用好，就一於星期五半day off，約埋朋友嚟呢間星期五六日先有午市嘅阿久根和牛立食燒肉店。雖然佢個名話立食，但其實都有座位供應，高枱配高櫈，同樣坐得舒服。落單後，店員首先會奉上前菜，青瓜配上蟹籽，爽爽甜甜咁，非常開胃。叫咗豐和牛二人盛，套餐有菜有肉又有飯，唔使傷腦筋。燒肉拼盤包括有肉眼A5、西冷A5、肉眼A4、西冷A4、牛舌、三角肋肉、牛肚，二人份量啱啱好。唔同種類嘅牛肉平時食得多，都唔使多講，特別值得推介嘅係佢嘅牛肚，燒烤後嘅牛肚表面會脆卜卜，入面就仍然保持軟身，非常好食。特選蔬菜就包括有粟米、冬菇同翠玉瓜，全部都適合燒烤。呢度用嘅烤爐都值得一讚，火候容易控制，唔會燒得過熟，真係手殘都冇問題。白飯上面灑上大量嘅飯素，唔需要牛肉都已經好好味。除咗配白飯，我都鍾意燒肉配生菜，可以減卻油膩感。燒肉汁總共有兩款，各有風味。座位前仲有唔同味道嘅辣椒粉，鍾意食辣嘅真係唔好錯過。