去到第一件事問咗有冇bb櫈先排隊，到職員（男）登記人數，再提佢需要bb櫈，亦見到佢mark低咗。
隔咗一陣職員（男）問我哋係咪會照排隊等呢？因為前面有張6人枱啱啱入座，我哋前面仲有一張6人枱，我哋要等而家呢張枱食完，再到前面張6人枱食完，先至到我哋 （心諗：吓？咁大個場得一張6人枱咩？都唔係丫，左邊有3-4張大枱喎！右邊2人4人枱都一樣可以拍埋變6人丫，睇餐廳會唔會拍枱嘅姐！我哋決定唔緊要，照等一陣睇吓點啦，因為見右手邊啲2人4人枱都開始食甜品）（睇咗其他食評，其實佢哋係咪唔歡迎大枱？加上職員講到要等兩輪，好似唔想我哋等咁）
不過再排左20分鐘左右，職員（男）話左邊有張大枱，但係比較熱，不過都有風機，如果唔介意就可以入座，仲比我睇吓張枱o唔ok先，（睇嘅時候，已經擺好位，bb櫈都已經放好咗），我哋睇過就話無問題！
係排隊位置再等咗2-3分鐘左右，職員（男）就話可以入座啦，不過唔好意思，無bb櫈，我即刻問佢頭先都擺好係度，咁突然無咗？佢先承認係佢自己出錯，張bb櫈拎咗去比另一位客人，所以無bb櫈比到，叫我哋唔好介意bb坐sofa丫，我話介意呀，你睇佢得10個月，無bb櫈佢點坐到sofa？椅同枱之間仲咁大個窿！
但係呢位安排入座嘅職員話有張枱埋緊單，十分鐘左右拎張bb櫈比我哋，咁我哋都接受，等一陣啦！
結果十分鐘過去…二十分鐘過去…當然就係無比bb櫈我哋啦，到我問場內職員（女）有bb櫈未呢？職員當然都係話無bb櫈啦！我問佢又話有人埋單，十分鐘左右比張櫈我嘅？佢好愕然話bb櫈保證唔到時間幾時比我，同埋幫我睇過情況都要一個鐘左右先有bb櫈，因為全部都係啱啱開始食。（吓？咁頭先話埋緊單個張bb櫈呢？又拎咗去比咗第二位客人？錯完一次再錯第二次？）
職員（女）全程都好好禮貌，亦好盡力去幫我哋睇吓個場有冇櫈，但都係無（有唔通唔比我用咩），同埋幫我排隊。我問佢：而家先排隊？（我相信佢唔知道入座時同事應承會比bb櫈我嘅事）結果我要開名同職員（女）講，係你個位同事「職員（男）」係入座時話人哋埋緊單比bb櫈我，而唔係我而家先排隊，我唔係打尖，亦唔係突然間話要bb櫈，或者麻煩你幫我問返佢啦！其他人可能唔知我入座前已經排緊。
呢個時候見到職員（女）眼都瞪大埋繼續保持笑容同我哋道歉，我哋都明白哂，佢真係好盡力去為佢同事補鑊，而做錯野嘅職員（男）係一直都迴避我哋！老公話算數喇，無就由佢啦，無謂食餐飯都要爭櫈仔，反正當時bb已經搞到sofa成櫈都係粥仔 都係要抹㗎啦，唔好同人爭櫈仔啦！Ok咁就算啦！
但係後來職員（女）拎咗bb櫈比我哋，多謝佢真係有心去幫客人處理同解決問題，我哋終於可以食埋半餐飯，而bb坐櫈櫈用咗20分鐘左右食埋啲粥仔就即刻比返張bb櫈餐廳
成件事，所有職員都係好好禮貌嘅，只有安排入座個位職員做得唔好，做錯嘢又迴避唔承認，說好會安排返亦無做到！咁大間餐廳得2-3張bb櫈？未試過去一間餐廳想要張bb櫈都搞到咁，仲要bb一食完粥仔就要即刻還櫈，好似我哋欠咗佢咁…
食物其實都係港式西餐，味道係合格嘅，羊架就無乜味同太un，甜品係最出色嘅，玫瑰咖啡好飲，性價比都係高嘅，不過如果要排太耐隊其實就唔值得啦！
由於無bb櫈，我哋手忙腳亂去控制bb唔好跌落地下，食物相無影到，最後淨係影咗二人餐個甜品🧇
