十二味不只是烤魚 (已結業)

行過紅磡舊hall附近，食厭咗附近既舖頭，就諗住試試新玩意。咁啱望呢間叫「十二宮-不只是烤魚」既舖頭，「烤魚」似乎我又真係未食過，於是入去八卦下～入到去，環境都幾寬敞，幾舒服。至於點菜呢，今次因為女友人病病地既關係，但佢又想食酸菜魚，於是就住點～第一樣就點左佢既最鍾意食既「酸菜魚」⋯第二樣我就選左最大眾化既「咕嚕魚塊」，但味道又幾出乎意料地好，啲魚塊又唔厚粉，唔會一啖咬落去無乜肉食咁，反而呢啲魚塊啖啖肉，仲要成碟都係魚塊居多，啱哂我呢啲食肉獸！仲有啲菠蘿切到細細粒，甜甜地又幾入味，正！仲有，由於女友人病左既關係，於是點左個清炒時蔬，即係「蒜炒小棠菜」。炒到幾清脆，同埋蒜味濃郁，平凡得黎但又幾好食，但係有d咸。另外呢，每個餐都有個小菜，係辣黑木耳加椰菜花，味道就偏辣，啱哂啲好鍾意食既女友人，但係呢，佢未好返哂既關係，我決定淨係比佢食一啖，就好似酸菜魚一樣，要唔辣既。至於野飲方面，我就飲左桂花冰釀，有酒香但酒味唔算濃郁，但有桂花既清新得黎又甜甜地，可以解膩。整體黎講，呢間餐廳值得一試！