Eggy (已結業)

想試呢間Eggy好耐啦，次次行過都聞到好香，但拎到一手係野又唔方便食，是日記住黎左食先去掃貨，呵呵。小店主打韓式土司，仲有幾款小食同飲品。點左吞拿魚沙律拼牛油果芝士黑松露滑蛋，好鍾意食牛油果，諗都唔諗就決定叫呢款了。啲餡料幾澎湃，塞到滿晒㗎。太厚了，根本一口咬唔晒，啖啖牛油果好正，係真嘅一片片牛油果，唔係果醬。吞拿魚沙律鹹鹹地又酸酸地幾好味，仲有半瀜芝士，同勁香口嘅黑松露滑蛋，再加上爽口生菜增加口感。方包本身帶少少甜味，用左牛油煎香，擠上自家制醬汁，店員話入面有兩種醬料，沙律醬同另一種帶辣味的，兩種加埋一齊係好味喎，即叫即整新鮮食真係無得彈。仲加左一份小食香芋地瓜丸，同樣即制熱辣辣，炸得外脆內軟嘅地瓜丸好好味，雖然話炸但又唔油喎，抵讚。餐牌有十二款吐司選擇，價錢三十幾至四十幾。仲有外賣套餐，到會叫呢啲又幾型喎，帶張返公司叫埋同事一齊叫先。真係好好味，有下次！