火鳳凰火鍋料理 (已結業)

平時去旺角食嘢想少人啲，我都會行近波鞋街後面，冇咁人來人往。喺太平道近旺角東站，有間上一樓嘅火鳳凰，火鍋料理，下午係食點心，晚上係邊爐。門口見到火鍋套餐幾吸引，六款海鮮有象拔蚌仔，元貝，海蝦，蟹，聖子，海魚，足夠四人份量。近乎所有位都係卡位，坐得寬敞。就算二人都係比四人枱。湯底都有十幾款，其中椰子紅棗清遠雞湯底，另上清遠雞半隻，果然係走地，皮下脂肪完全冇。睇嚟隻雞真係做好多運動，而雞味重，有趙口。飲下一個湯，都好有椰子清香，唔覺有太多味精。西班牙梅花豚肉好大碟，有十塊豬卷。湯底好飲嘅時候，最啱就係叫竹笙同腐竹。有信心下次試吓飲茶，坐得舒服嘅酒樓唔算多。