喜茶 (K11購物藝術館)

营业中

休息中

k11分店新開張做緊買一送一個兩日冇去到，不過都想試下。咁啱嗰日經過尖沙咀，見到『雪山莓莓凍』 做緊半價， 跟住佢嘅指示上IG宣傳，用到呢個優惠，仲有禮物送。排隊都排咗好耐，前面眼睇有大概十個人，不過可能大家都用呢個優惠，又要㩒IG，又要㩒嚟㩒去，所以落單嘅時間都用咗大概30分鐘。落單嘅時候店員話要等20分鐘，不過我見到佢啲飲品都出得好快，最尾等咗5分鐘就攞到喇。其實嗰日天氣幾凍，我係想飲熱飲嘅。不過見到呢杯嘢半價，又只係得凍飲，就頂住頭皮試下啦。叫店員少啲冰，佢話少冰嘅話，會比較多碎冰，無咁滑。但係因為我覺得太凍，所以都係叫咗小冰。 果然係飲到好多冰粒。因為我自己唔想飲咁甜，所以嗌咗無糖。杯嘢飲裏面有士多啤梨味，係新鮮嘅士多啤梨，仲有啲士多啤梨味嘅啫喱，可以咬下，有口感。就咁飲就冇乜味，加埋啲cream就好啲。杯嘢最貴嘅應該係頂頭粒士多啤梨，又真係好大粒，有幾好味喎，夠甜。如果原價49元買呢杯嘢，我就唔會飲啦。半價一試都可以嘅。