麗島小廚 (已結業)

聽講呢間餐廳嘅午餐好抵食，於是就決定去試吓。兩個人一人一個餐，一個係豉汁蒸倉魚，另外一款就本來想嗌美極一口牛，但係因為賣晒，所以就叫咗菜脯肉鬆煎蛋角。真係好大份，而且估唔到仲跟一碟油菜，另外仲有老火靚湯同埋餐後飲品一杯。菜圃肉鬆蛋角就$49，豉汁蒸倉魚就$65，兩款餸嘅材料都好新鮮，尤其是條倉魚，肉質唔錯，果然真係非常抵食。值得一提嘅係碗老火例湯，真係冇落味精，非常好飲。由於間舖頭本身係做雞煲嘅，所以好多卡位，疫情期間就算去堂食都安心好多。