哥哥添飯•妹妹泡茶 (已結業)

朋友喺觀塘返工，佢話成日都見到好多人排隊去「哥哥添飯•妹妹泡茶 」食飯，於是我哋又一齊去試吓。午餐時段係只可以walk-in，所以我哋趁佢一開門就入去。餐廳主打台灣菜，選擇都幾多。價錢經濟實惠，怪唔得知中午時分，座無虛席。我揀咗「過激椒麻脆炸雞配魯肉飯」$108有三塊炸得酥脆嘅雞件，調味做得唔錯，不過我覺得一D都唔辣，只有少許椒鹽味。魯肉飯裝滿一大碗，份量十足，我同朋友都食唔晒啲飯。魯肉半肥瘦，入口軟滑，醬汁甜甜地，有台南風味。跟餐仲有三小碟前菜，醃苦瓜清甜、炸蝦仔香脆、醃醬菜則比較咸。跟餐仲可以揀飲品，我選擇咗「台式烏龍奶茶」茶味一般，飲唔出係烏龍茶，奶味都較淡，可能其他飲品會特出一點。