和牛燒肉一郎 (新都城中心二期) (已結業)

曾經都食過幾次呢間分店，覺得比起銅鑼灣冇咁壓迫感，環境都幾好。今日經過就坐低咗。兩個人都叫咗一個定食一個100 gram一個200 gram，另外再每人加$48可以任食出邊拎嘅嘢。跟餐嘅麵豉湯鹹到腎病咁濟，仲有浸奇怪嘅膠味。飲品區有雀巢檸檬茶忌廉溝鮮奶等等，無糖可樂得返三罐。沙律區所剩無幾，但係都冇人理，兩樽沙律醬一滴都冇，前前後後叫咗三個員工，其他客人都有反映，坐咗喺度半個鐘都冇人去加。咖啡機壞咗，有幾個客投訴，但係有個侍應求其撳咗幾下之後沖到一杯之後都冇人再幫手。最搞笑係有一個區域係有飯、紫菜蔥醬汁等等嘅嘢去撈飯，本身個定食都有包飯，嗰度有張紙寫住午市加$48都可以享用，我問嗰個整咖啡機嗰個女士，點解呢度咩都冇嘅呢？請問係咪會fill 㗎？佢話：呢啲下晝先有個喎！我望望手錶而家下晝兩點幾，我話而家兩點幾㗎啦喎，唔係下晝咩，佢就話下晝係五點呀！呢啲唔係好高價值嘅嘢，但係你張紙寫到明午市會有，我哋又真金白銀加咗錢，點解我問你嘅時候你話下晝係五點呢？有其他客舉手叫呢位女侍應幫手，佢都係用好差嘅態度問點呀。埋單又係嗰個侍應拎張信用卡都可以跌落地兩次，埋單三百幾蚊一肚氣。