利寶閣 (已結業)

上星期同屋企人去上環嘅無限極廣場二樓食自助晚飯放題，走嘅時候，見到對面嘅〈利寶閣〉都有做午市任食放題，見到任食放題呢幾個字樣，我哋呢啲大胃王一定唔會放過。我哋一坐低，就攞起枱面嘅點心紙一路畫畫畫，點心未到之前，侍應就先遞上原隻鮑魚酥同埋花膠灌湯餃，只限每人一份，隻鮑魚都幾新鮮，肉地幾彈牙，加上酥皮底好特別，而花膠灌湯餃飲落好鮮甜好正。而點心比較特別嘅就有荔蓉带子，佢外皮炸得好鬆脆，裏邊就好香滑。其他點心都好足料，我覺得比其他酒樓更好味，我地食左幾轉。最後我哋又叫咗啲甜品，懷舊芝麻卷同埋楊枝甘露，芝麻卷真係好有芝麻味又唔會太甜好啱我食，楊枝甘露好冰涼好爽，一個字正，呢餐真係好抵食。