三井日韓料理 (已結業)

行過兆萬樓下有人派傳單，見到有間新野開左，有減10蚊優惠，都係198 加一，就試下呢間日韓放題。個場好大，唔會似其他放題餐廳甘勁逼，4人卡位都可以坐到6個人。環境擺設有日本feel，侍應好好禮貌，揚手都即刻會過來，清碟速度都好快。餐單分好晒類別比你簡，野飲同甜品就係門口旁邊個大雪櫃度。個度都有d凍，叫左杯熱茶飲，估唔到又幾好飲，好有茶味。我地加左$50變升級放題，刺身會多左好多款比你簡。升級版刺身松葉長腳蟹，店家好貼心提供剪刀比我地剪來食。珍寶赤蝦刺身，巨型大蝦，鮮味夠，味道唔錯。炸物天婦羅係每到日本餐廳必點野食，呢度炸粉夠晒薄，唔會蓋左食物本身味道。鐵板燒帶子牛油燒，好正，淡淡牛油味道，帶子非常juicy, 好岩送啤酒。薄燒牛肉，外貌以為係金菇肥牛卷，牛肉味濃，熟度剛好，有咬口亦保留肉汁。升級甜品忌廉泡芺同朱古力泡芙味道唔錯，唔會太甜，朱古力雪糕，迷你心太軟一隻細湯匙都放到，一入口濃濃既朱古力湧出來，即刻了番啖雪糕放入口，感覺勁正，又熱又凍。