廉記冰室 (春園街) (已結業)

今日去到灣仔做嘢 本身去諗住食餃子 但係見排曬長龍就去咗春園街後面嘅呢間廉記冰室 聽啲阿姨講話係新開 開咗一個月都冇 門口又好新鮮嘅麵包同蛋撻香噴噴 勁吸引 首先散叫咗個鮮雜菌奄列 奄列入面嘅炒蛋勁嫩滑 入面仲有啲好似鮮奶咁嘅汁 加上新鮮雜菌 好香濃 仲有兩大塊搽滿牛油嘅多士 一啲都唔吝嗇 朋友就叫咗個西班牙奄列 入面係茄汁底 配上燈籠椒絲同埋肉碎 相比之下鮮雜菌庵列比較吸引 個人唔太喜歡食茄汁 焗肉醬意粉意粉 質比較淋身 似係港式快餐 肉醬好多而且芝士份量都唔少 坐坐下時間已經到咗下午茶時段 即刻叫番個鹹牛肉炒蛋鮮油菠蘿包食下 個菠蘿包仲喺呢間餐廳每日新鮮手造 個皮脆卜卜 配上咸牛肉炒蛋好惹味 味道夠晒夾 值得一提嘅係呢度嘅紅豆冰都夠曬足料 淡奶味勁濃 紅豆唔太甜 而且仲好多豆豆肉 以冰室嚟講價錢算中規中矩 但係食物質素頗高 值得一去