吞POT 雞煲火鍋.住家菜 (譽發廣場) (已結業)

今日喺旺角行完街，見好耐無食過雞煲，就喺老友嘅介紹之下，上咗嚟譽發廣場呢一間雞煲店試試。老友話譽發廣場店同726店一樣，一入門口就有好大嘅一缸龍吐珠；店內環境以打邊爐嚟講係少見嘅寬敞舒適；剔完嘢食之後，店員攞嚟調味九宮格，生蒜炸蒜香蔥豉油辣椒油豆瓣醬芝麻醬麻辣醬沙茶醬應有盡有，令人選擇困難。重慶麻辣雞煲半隻大辣，落咗單之後無幾耐雞煲率先送上，呢度嘅雞煲一擺上枱即刻食得，有別於其他雞煲店要冚蓋焗多幾分鐘嘅食法，啱哂我呢啲心急人上；一打開雞煲蓋，麻香撲鼻而來，食一啖雞髀肉，嫩滑非常，大辣辣得過癮；其他下欄洋蔥芹菜蒜頭蔥頭等等都異常入味， 直情食到唔捨得加湯打邊爐。自家炸響鈴，響鈴即叫即炸，蛋味濃郁，一啖咬開，裏面嘅芝士傾巢而出，淨食都經已相當滋味，係咁咦點少少雞煲汁嚟食，更加叫人難以忘懷。蜂巢豆腐，蜂巢豆腐件件厚切，分量極多，落完兩輪先記得影相，蜂巢索盡雞煲嘅精華，令到平淡嘅 豆腐變得惹味非常。脆肉鯇片，脆肉鯇片口感爽脆，好明顯用上咗新鮮嘅貨色，肉片比坊間一般厚身少少，一碟都有成十件八件，相當抵食。皇帝菜，經過一輪肉身拼搏之後，有天然香氣嘅皇帝菜作結，身心滿足。