相馬日式火鍋 觀塘 (已結業)

星期五晚上同男朋友行觀塘，行行下就黎左呢間邊爐放題。佢個大閘蟹放題睇落真係好吸引，我就諗住一試究竟。店舖位置好容易搵，而且位同位之間相當寬闊，坐得好舒服～坐低巡視一輪，見到自助吧有好多種唔同嘅食材任君選擇，例如粟米、芽菜、南瓜等等，健康又多選擇。海鮮拼盤啲海鮮非常新鮮，色彩光澤都係上品，而且好似扇貝、元貝、帶子呢啲食材，擺落火鍋一陣之後完全唔會縮水，仲吸曬啲湯汁，非常美味～我地叫左豚骨湯底，濃厚豚骨味道，打邊爐一絕!!優質豚肉同美國特選牛肩胛都好令我地感到驚喜，好難得邊爐放題嘅豚肉係咁鮮，一啲梅味都無。牛肉就更加不在話下，好新鮮又無雪味，令人好想一試再試。最後壓軸嘅係我最期待嘅大閘蟹放題，呢間嘅大閘蟹唔似出面食嗰啲又細又無膏，反而啖啖肉又好多膏，仲要勁新鮮!! 諗住今個月同下個月黎多幾次，因為淨係食咁高質嘅大閘蟹其實都回到本。