冰室99 (已結業)

北角和富見到有間任飲任食既雞煲，呢區黎講比較少見，明爐烤魚或雞煲$199可以任食兩小時，啤酒汽水任飲！小童老人家仲有折！所以當晚就和家人一齊幫襯，3人同一齊去，1位仲要半價，性價比幾高。而且環境光猛乾淨！感覺相當不錯。先上雞煲少辣，陣陣麻香味道滲出，食慾大增！醬汁底調得唔錯，夠濃香但唔過咸，雞件夠足料而且相當肉嫩，非常吸味好惹味，食到停唔到口！旁邊既洋葱蒜更不能忽視。之後加雞湯打邊爐，肥牛質數都唔錯，色澤紅潤，解雪做得好好！肥牛唔會太膩，入口夠嫩身！之後丸類用上振興牌子，唔怪得咁多靚丸！份外高質，入口更加彈牙，墨丸仍食出粒粒墨魚質感，相當有層次。另外魚皮亦係高質貨，香脆卜卜，唔油膩夠爽身！魚香味極香。之後再煮個烏冬煙煙靭靭有彈性，非常完美。再加飲左幾罐啤酒汽水，好滿足。