校長燒肉日韓料理 (西裕街)

营业中

休息中

位於元朗西裕街嘅校長燒肉日韓料理，黃金時段可以兩小時內任食韓燒，火鍋，同埋日本野，包埋甜品同飲品，週末價錢成人只係$218 ，剛好今日朋友生日，可以獲全單八八折。餐廳大約分為好幾個區域：壽司刺身區、燒肉區、火鍋區、熟食區、甜品區、同埋飲品區。刺身有三文魚、吞拿魚、希靈魚、蟹棒、玉子、帶子同埋蝦，每次只可以攞三款。刺身新鮮肥美，食落爽口，令我地相當有驚喜。燒肉區有各式各樣嘅肉類，最令我哋驚喜嘅就係雞翼竟然有成三款味道，全部都醃得好入味，除此之外，仲有雞扒，雞軟骨，秘製叉燒同埋蒜蓉牛油粟米。熟食區有炸物，東南亞式蔬菜及肉類，仲有中式點心添呀，燒賣同小籠包更加係必食之選，如果唔係因為胃部容量有限，每款都想試吓呀。火鍋湯底有三款，我哋今日試嘅係豬骨湯，肉味香濃，加入蔬菜同埋餃子後，真係非常美味。甜品區除咗有蛋糕，布甸，果凍，仲有多款雪糕，連最近推出嘅棉花糖蘋果味甜筒都有，又點可以唔試吓呢？飲品方面，除咗有普通罐裝同紙包飲品之外，仲有花茶專區，等客人可以跳出自己喜愛嘅花茶，食完咁多油膩嘅嘢，可以消滯。因為朋友今日生日，所以享有全單八八折優惠，食咗咁多嘢，每人平均都唔使$200 ，都算係性價比高。