勝手 (已結業)

朋友話好想食日本火鍋，不過唔要放題又唔要吉野家，諗左好耐揀咗好耐最尾選擇位於銅鑼灣嘅呢間隱世日本火鍋刺身餐廳選擇了二人餐，分享更開心。未上嘢食之前已經有日本茶，好貼心地定期加茶！醬汁就有豉油和芝麻醬，比較少見芝麻醬。前菜有花螺+醃製左既蘿蔔，味道濃郁，特別花螺有咬口，蘿蔔口味獨特。打邊爐之前一定要揀湯底，昆布鰹魚甜甜地，啱晒胃口。主打就係毛蟹和A5和牛。當中毛蟹質地比較鬆散，口感偏向稔，同平時食既蟹好唔同，雖然冇咁彈牙不過鮮味十足。A5和牛都唔需要多講，「未食其味，先見其貌」，無論係色澤或者脂肪分布，都比起平日的佔優。在舌頭上幾乎即溶，油脂充足但又不太油膩，點上豉油/花生醬同樣好味。蔬菜籃好多菇菜都有，雜得黎夠鮮，食完海鮮肉類之後即刻將所有蔬菜放入去，唔單止可以吸收到魚湯味道還可以有蟹味及牛味，鮮上加鮮。最美最飽肚嘅選擇咗一款粥，本身以為要搞好耐先有得食，點知原來已經係半製成品，上面仲有蟹膏和蟹籽，蟹膏係經過特製嘅，擺入去冇幾耐就食得，又香又滑。特別係加多左一隻雞蛋，令到口感更加順滑。食到7788 ,終於到最後一款就係甜品，紅豆綠茶奶凍夠清新，食到飽！