扒王之王 (已結業)

今日工作關係，過到嚟大角咀，對哩度唔係噤熟路，想搵個地方食個早餐都好似冇乜選擇。經過港灣豪庭，見到扒王個"招牌"，佢個招牌真係哩世都認得佢！扒王曾經都係我最愛食府，不過，近幾年好似做得麻麻，都冇去過，見冇咩得揀，早餐都應該唔會有啲咩事嘅！入到去，裝修都唔錯喎，優雅得嚟又唔係太豪華，坐位又大，又有電視睇！最重要人唔多，坐係度hea吓都幾好！我叫咗個西式早餐 B8 吉列豬扒煎蛋配牛油方包及火腿 $24 + $2 (轉多士) ，朋友就叫咗個 B4 金菇叉燒配公仔麵 $22 ，吉列豬扒夠香，多士夠燶，可能係我鍾意食香口嘢，我幾滿意呀！ 朋友個湯麵，見到都幾好，佢話個湯底幾好，係個公仔麵林咗少少，我都叫佢咪慳，加幾蚊轉個出前一丁咪好囉！整體嚟講，唔係一間差嘅餐廳，係價錢比一般茶餐廳貴，但勝在環境舒服，約朋友嘆個早餐，都係個幾好嘅選擇。廿幾蚊一個早餐，而家乜都貴，大家樂都差唔多要。