漁吉海鮮丼專門店 (已搬遷) 新店位置

俗語都有話「辛苦搵嚟志在食」，放假食Lunch梗係要對自己好啲、食好啲！之前去九龍城食泰菜，已經有留意一間新開嘅日本料理叫「漁吉」，地點都幾易搵 -- 喺衙前圍道、南角道交界今日12點去到，餐廳啱啱開門；雖然我同朋友坐咗喺近門口位置，但係感覺唔差，可能因為枱與枱之間嘅距離適中，光線又充足，坐得幾舒服。坐好諗住倒杯茶飲，點知個侍應提我：要搖勻先倒出嚟，我再望望枱面上一個溫馨提示，原來個壺入面裝嘅唔係茶，係麵豉湯；雖然倒出嚟嘅湯無任何配料，不過我已經覺得賺咗，因為佢用白麵豉，飲落唔會過濃，我仲飲咗兩碗我叫咗一個北海帆立海老丼，朋友叫咗個漁吉特選丼，另外加多個清酒煮蜆。清酒煮蜆 – 非常有驚喜嘅一個小食！清酒同蔥加埋聞落清香；飲落有酒味但唔會過濃或過咸，有啲似溫清酒；用沙白蜆無沙，煮嘅時間啱啱好，蜆肉鮮嫩；有少量幼薯粉，連湯一齊食，正！北海帆立海老丼 – 先要讚wasabi，唔係用粉沖或者現成擠出嚟嘅wasabi膏係磨出嚟嘅質感，食落唔嗆鼻但香。飯面有半個泰國青檸，我擠咗少少青檸汁落赤蝦同帆立貝。玉子幾甜，食落唔乾帆立貝有兩隻，面輕微燒過，味道唔錯，唔太鍾意食火灸嘅朋友落單前可以同侍應講講。