塩玉居酒屋 (已結業)

銅鑼灣嘅日本嘢琳瑯滿目，星期日想食下刺身同串燒，唔想逼又唔想等位，決定去登龍街樓上食店碰碰運氣。比起以前，呢條街嘅居酒屋已經少咗好多，見到塩玉居酒屋水牌，決定上去解下日本相思之苦！餐牌好豐富，尤其刺身更加好多選擇，廚司推介好多日本直送刺身，最後點咗9款，夠我同朋友兩個人食。其中最值得推介係帶子、銀雪魚同三文魚，食得出夠新鮮，入口即溶，完全符合我嘅期望。話到明想食串燒，當然唔少得牛同雞串。牛串可以話出色！肉質嫩口，就算燒得香口亦冇損失到肉汁，另外兩碟雞分別有唔同醬汁，食得出好有心思，有口感之餘香味都唔可以忽視。由於本身唔係太肚餓，我哋只係叫多一味海鮮燉蛋同埋一客淮山湯。兩樣小吃都好足料，燉蛋入面有大大粒冬菇、魚肉同蝦，同出面食過嘅好唔同，加埋天氣轉凍夠晒暖身；另外淮山湯夠香之餘，淮山同雜菜都好豐富，簡單一餐，好滿足！