韓舍 (已結業)

都有一段時間無同內子去拍拖出街食飯，今日興致勃勃去咗旺角韓舍一試。 前一日訂咗位嘅關係，穿過人群，對個電話號碼，等都唔使等就入咗去。估唔到兩個人都俾個可以坐5~6人嘅卡位俾我地。 屁股都未坐暖，就行返轉睇下有咩食有咩燒。喺入面除咗韓燒應有嘅肉啊肉啊同埋肉之外，仲有好多其他唔同嘢食。冷盤嘅凍蝦、青口、各款魚生刺生壽司、沙律。各種熟食、熱湯。仲有好多唔同款式嘅貼品，雪糕……嘢食款式數量直迫酒店自助餐。味道方面，好多都唔差。韓燒嘅肉雖然都係一貫用蘇打粉整淋啲肉再加味精，但味道唔會過鹹。熟食試過佢啲牛腩同藥饍雞腳，味道都唔差。而內子覺得炸魚柳出奇地好食，想再夾已經無晒……另外啲甜品款式多之餘，都係幾好味。 當然，都試過拎咗啲伏嘢返黎食。好似冷盤嘅玉子豆腐，甜品嘅藍莓餅乾……服務方面，收拾食完嘅碗碟速度幾快，而且態度幾好。有一下，內子想幫我去拎嘢食，向我問喺邊度有得拎，咁岩個服務員行就就順便解答埋，仲親自帶埋佢過去，真係幾好。 整體黎講以百幾蚊有咁多嘢食，CP值幾高。但係坐耐少少會開始多油煙，韓燒嘅通病抽氣系統有待改善。