茶園

营业中

休息中

一般酒店自助餐賣點都係貴價食材夠多，選擇豐富，樣樣都有。但茶園就走另外一條路線，佢以西式食物為主，種類唔算多但就講求每種食物嘅質素同特色。另外佢用餐時間特別長有四個鐘，環境又非常之舒適，仲有即場音樂演奏，氣氛真係無敵，舊年食過一次印象非常深刻。最近佢做咗一個65折優惠，即刻訂枱！同上次比較，大部分食物水準繼續高水準，包括自家製肝醬、威靈頓牛扒、羊扒、煙三文魚，生蠔都唔錯雖然比較細隻但味道濃郁。另外跟餐每人會有一隻龍蝦，可以選擇唔同煮法，我揀咗芝士焗。但有啲失望嘅係甜品，唔知係咪將貨就價選擇比較少，特別係之前做得好出色嘅自家製特別口味雪糕今次完全唔見，剩低嘅口味味道只係一般。另外依家好多自助餐除咗提供一杯餐飲之外都會無限提供簡單飲品，例如水果茶或者果汁，但係茶園仍然維持只提供清水，要加錢先可以有其他選擇，呢樣希望以後可以改善。另外當晚喺有優惠嘅情況下但都未滿座，真係有少少擔心，希望香港餐飲業盡快復甦。