地點：西灣河太安樓
菜式：台灣野
餐牌：平日兩點至六點有下午茶套餐，主食20選1，有米粉、吐司、拌麵、飯、手工麵、小鍋等，好多選擇。套餐配飲品6選1，可以加錢升級餐飲。另外都有地道小食。
2
慢煮烏醋豬軟骨便當 $56
慢煮烏醋豬軟骨便當有超大碗白飯底，面頭有三大件豬軟骨，豬軟骨好淋，一咬就化，而骨位帶少少彈牙，超正！而味道好入味，酸酸甜甜醋味令人好開胃。伴有酸菜，椰菜，紅蘿蔔同粟米粒，色彩豐富，仲有一隻蛋角仔。
士林鹽酥雞滷肉飯便當 $56
呢個便當就同慢煮烏醋豬軟骨便當基本上一樣，除左豬軟骨變左好多鹹香鹽酥雞，滷肉同肉鬆之外，好豐富。
初遇紅燒半筋半肉手工麵 $62
招牌紅燒半筋半肉手工麵大大碗，手工麵係白色粗身有咬口麵條。牛筋三條，好淋，食落滿嘴骨膠原。牛腱心兩大條，肉中間有好多筋，整得超淋，好好食。伴有好多鹹菜同蔥花。
慢烤雞腿蛋吐司 $42
烤得香脆吐司包住嫩滑雞腿肉同流汁雞蛋，邪惡不過好味道。
小食可以無限追加，無限一個餐只可以加一款。
彰化黑麻油雞翅 加$18
彰化黑麻油雞翅一客兩隻，面頭灑上白芝麻粒，用行友人秒速清左。
滷肉A菜 加$22
新鮮健康A菜面頭加上適量滷肉。
麻辣鴨血 加$16
麻辣鴨血一客六薄片，好爽脆，面頭加上辣椒同花椒配蔥花，味道非常辣。
愛文芒果起司奶蓋 加$12
愛文芒果起司奶蓋面頭係厚厚芝士奶蓋，又香又滑，芒果味天然唔假，好滿足。
鮮鳳梨水果茶 加$8
鮮鳳梨水果茶加有新鮮橙片同菠蘿粒，味道帶濃濃鮮果味，而茶味唔會太濃。
珍珠奶茶 加$8
珍珠奶茶有好多珍珠係底，同行友人飲得津津有味。
冷泡台南高山烏龍茶 跟餐
冷泡台南高山烏龍茶係膠樽裝，好方便又衛生。
呢度食物質素唔錯，最緊要係價錢非常街坊價，而且無加一，好抵食，平日午市滿座。裝修光鮮，座位舒適。
