初見

营业中

休息中

朋友住係荃灣，前幾日去完佢屋企，之後想落樓揾嘢食，佢話佢有一間平時有食開有得食石板燒的餐廳好正，所以介紹我同佢一齊去食。我地去到個時大約七點到，都未算太多人，點知坐坐下就高朋滿座啦，真係遲多少少都要等位。我地點左一個佢十級推薦的香草吉列牛石板燒，配白飯和溏心蛋，之後再叫左一個日式豚骨叉燒拉麵。落單後，好快就上枱啦，我真係第一次食呢種石板燒，我覺得好得意同好好玩，所以真係好鍾意呢個石板燒，朋友仔果然無介紹錯，啲牛放上去石板上面，想要幾熟自己決定，佢亦會比定啲油脂粒你，比你塗上石板上面，方便你煎牛，佢亦都有汁同鹽比你選擇做調味，個汁就有少少似沙薑溝柚子咁上下味，甜甜地，又有少少微辣，都幾正，不過我就覺得沾鹽多啲，而個牛本身都好好味，唔加任何調味料，就可以食到啖啖牛味，配以香草的味道，所以好好味。至於個豚骨拉麵，叉燒係有煎過的，所以會有少少脆口，味道亦有所提升，至少個湯底都好正，所以我都有飲埋個湯，而且拉麵份量都好足，好飽肚，今次真係好滿意，食至餐咁好食的嘢食，朋友仔真係好介紹。呢間餐廳仲要全日免收加一，見到佢貼出來，係聖誕個啲日子先收加一，都真係好抵。