我哋晚上八點半鐘去到，見到有好多人食緊。店員第一步係同我哋探熱消毒，一坐低仲畀滾水我哋洗啲碗碟，感覺放心好多😊。餐廳有個醬料區供客人自行混醬，茶芥／醬料費每位$20。
火鍋湯底有四款選擇，但朋友只係得一款啱食，所以我唯有捨命陪君子，揀咗老鍋秘製麻辣鍋(小辣)($158)。湯頭以多種香料同藥材熬煮，但我眼見係勁多辣椒、花椒同八角等...，心諗大件事了，會唔會辣到食唔到㗎🌶。
好彩如佢餐牌所講，湯底麻辣度偏低，連食開BB辣嘅我都接受到，而且幾好味😋。由於唔係太麻太辣，所以食物味道無被蓋過。另外，湯底本身仲有埋鴨血同凍豆腐，兩樣都好索味，而且份量超多！
豚牛雙拼($238)，呢碟仲唔係一石二鳥😂，有特選極本黑毛豬梅肉🐷同安格斯牛小排🐮，兩款肉各有6-7片，都幾大塊，牛肉比較好食。
涮鍋小羊肉片($98)，味道都唔錯，🐏羊羶味剛好，大約有8-10卷。全部肉片都解哂凍，唔會凍冰冰。
蝦丸($48/半份4粒)，外表平平無奇，但係食落非常有驚喜。因為蝦丸超級無敵彈牙，而且仲食到原粒蝦肉🍤。
黑白雙滑($88)，由於蝦丸咁高質，所以即刻追加咗份墨魚滑🦑。蟹籽墨魚滑比較多地方有得食，而墨汁墨魚滑就更有噱頭，因此嗌咗黑白雙滑，兩色味道實則一樣。墨魚滑同樣好食，但蝦丸稍為更勝一籌。
老鍋台灣麵($58)，餐廳簡直係「畀足面」🤣，估唔到麵條有成兩大餅，一定能夠醫飽肚仔。淺綠色嗰隻麵條比較粗身，淥完口感都仲好爽；而白色嗰隻就相對幼身同淋，食落有啲似麵線。我鍾意前者多啲！埋單先發現原來個麵可以凍食，早知試下啦。
飲品方面，我哋試咗杞子杭菊露🌼($28/杯)同櫻花蜜🌸($22/杯)。前者比較清香，感覺好似好清熱咁。後者意料之外的好好飲，櫻花味唔會太人工糖水，飲落好舒服(唔識形容)；不過都比較甜，冰塊溶緊啲會更正。我直頭Encore咗一杯，畢竟食緊辣嘢嘛。
環境方面，冷氣非常凍，但正正啱哂打邊爐，如果唔係會食到流汗🥵。另外，抽風系統亦算係咁，食完走成身都無咩味。
服務方面，其中有位女店員特別細心👍，佢見我哋個湯底好似越煲越辣，所以就畀咗個兜我哋搬走啲辣椒辣油。
總括嚟講，食物質素真係幾好，難怪咁多朋友推介，其中手打丸最為出色；而我亦對麻辣火鍋有所改觀，因為估唔到連我都食到😛。定價來説，確係唔平，但適逢而家有八折，都抵咗啲，可以幫襯下。
