一踏足餐廳，不禁哇左一聲！餐廳中式設計，以宮廷為主題。不論係餐桌碗碟或者吊燈屏風等，每個佈置都富有中國宮廷特色，別具一格
置身其中感覺就好似時空穿梭，返左去古代嘅世界
1
餐桌及用具等都非常別緻，猶如置身宮廷嘅感覺。店員親切友善，服務周到。
江南三小碟
分別係木耳，牛肉同埋醉豬手
木耳酸酸甜甜好開胃，牛肉湯汁味道好濃，啫喱狀嘅感覺入口即溶，齒頰留香！！
另外醉豬手完全去骨，入口啖啖肉！酒味唔算好濃，好易入口:)
菊花豆腐湯
師傅刀功好厲害，每條豆腐都切得好薄好幼，好似一朵菊花咁，賣相非常精巧！豆腐湯入口清甜，呢道菜式真係好睇又好食
酸菜桂花魚
二人分量足夠，桂花魚切片上，冇乜骨，可以好放心食！酸菜味道適中，唔會話太過酸，個底仲有好多芽菜潻:)
松露醬獅子頭
獅子頭配松露呢個crossover都幾特別，感覺似中西合璧咁。獅子頭大大粒，肉質好軟腍，唔會硬掘掘，整得唔錯
東坡肉
東坡肉嘅肉同埋脂肪比例非常均勻，亦都炆得夠淋，有入口即溶嘅感覺，配埋饅頭食有一種中和肉類肥膩感
高湯浸菜苗
食咗幾款濃味嘅菜式，係時候要揀番清淡啲嘅蔬菜喇。菜苗好幼嫩，完全冇渣，配埋上湯夠入味
格格府炒飯
炒飯粒粒分明，好夠鑊氣，炒得非常之香。
桂花酒釀丸子
酒釀丸子做得好出色，丸子好軟腍亦都夠煙韌，桂花味濃郁，好難得遇上一碗好味既酒釀丸子
香橙胖大海
第一次食胖大海，味道又唔錯喎。杯入面有d香橙皮同埋啫喱，感覺夠特別
朋友對今餐生日飯嘅安排好滿意！大家都食到美味菜式！好幸運遇上非一般嘅餐廳，不論環境，食物，同埋服務的確係一流！
