吉列牛忌廉烏冬專門店 (百樂中心) (已結業)

一直以為呢間餐廳係日式，原來佢係韓國過江龍。今次試左個2人set加一個小食。2人餐（$246）有一份吉列牛、一碗飯、一個咖喱忌廉烏冬同埋兩杯飲品。主角吉列牛都幾大塊，足夠2人分享。吉列炸粉唔厚，只係薄薄一層，牛肉所以按自己喜好燒成自己鍾意嘅熟度。牛肉燒過後好香，薄薄吉列炸粉包住鬆軟多汁牛肉，沾上wasabi醬油或者wasabi沙津醬，各有風味，配上珍珠米飯一流。咖喱忌廉烏冬上枱時見到嘅係一碗純白色嘅忌廉，慢慢咖喱烏冬就浮出來。食嘅時候將忌廉撈勻，配料有牛肉、冬菇，咖喱烏冬香濃惹味，煙韌有咬口，忌廉令到烏冬滑身順口，好好味。蒜片牛舌芯 $58牛舌厚度適中，少少爽有咬口，但唔會韌，食嘅時候連同炸蒜片一齊食，惹味香口，味道好夾。飲品方面，我哋揀左Citrus Ocean同埋Passion Punch，兩杯打卡一流，柚子同熱情兩款味道都好清新解渴。