麻辣風雲 (荃碧大廈) (已結業)

台灣邊爐鴨血就食得多，毛血旺呢個煮法真係第一次試！本身直情唔知乜嘢係毛血旺㗎，係同行朋友話比我聽我先知道原來有鴨血喺入面，爭啲就錯過咗一個有得食鴨血嘅機會！佢呢度嘅毛血旺係$68，可以自己揀配咩配料食，就每樣額外再加錢，有啲似打邊爐咁，仲有得揀食小辣、中辣、定大辣，幾好～本身我expect淨係鴨血再加自己揀咗嘅配料，點知原來佢本身已經包蓮藕、芽菜、萵荀同海鮮菇，爭啲以為佢上錯菜！啲鴨血好肥美，同埋冇煮到散開一忽忽，即刻加晒分！好似發現新大陸咁，以後除咗邊爐又多一個選擇去食鴨血～我地再嗌咗酸辣土豆絲同辣子豆腐，兩樣都係$108。酸辣土豆絲好爽脆，爽到好似食緊青瓜咁，一啲都唔似淋劈劈嘅薯仔，啲辣油唔算話好辣，加埋酸酸味味，超級開胃；而個辣子豆腐都相當出色，完全做到嗰種外脆內軟嘅口感，入面啲豆腐冇爛容容，仲係熱辣辣，出晒煙，火候十足，鑊起小炒真係強推呢個！越食越起勁，加多咗道乾煸肥腸$128～煮肥腸嘅工序真係好複雜，又要洗又盛，平時真係冇乜機會食，難得呢度有就緊係叫。啲肥腸果然夠晒肥味，份量都幾多下，同啲辣椒炒埋一齊，每一吋肥腸都沾滿住佢地辣椒味，辣得好過癮，正啊！