土耳其小城 (德範大廈) (已結業)

事緣我琴日中午去荃灣做野，放lunch個陣啱啱好經過德華街，見到依度有一間專做中東菜同埋南亞菜嘅餐廳。心諗自己冇咩食過中東餸，就行咗入去試食。一入到去餐廳裏面，就已經聞到極其濃郁嘅香料味，就即刻捉住咗企係我隔離嘅店員問有咩推薦菜式，店員好有禮貌咁推薦咗我叫南印度馬薩拉雞、芝士烤餅同埋土耳其燒羊架，正係店員嘅服務態度就已經值得加分。👍👍👍第一道上嚟嘅菜式就係芝士烤餅，一上臺就已經聽到滋滋嘅油炸聲傳過嚟，開翻眼一望，就見到餅皮上略帶些微嘅焦點，單論視覺便已係一大享受。緩緩撕下一小塊放入口中，芝士味濃郁🤤第二道菜式就係南印度馬薩拉雞，調味料需要乾身又啱啱好黏附係食材表面，先至有資格被稱為「馬薩拉」🤔而店家顯然係依方面處理得極好，唔會將馬薩拉整到好似咖喱咁，又忠於傳統，係馬薩拉內加入番茄，食起身會有一種酸甜味隱隱約約透現係馬薩拉裏面。🥰最後一道菜式就係土耳其燒羊架，表面依附住店家秘製香料，再佐以檸檬嘅幽香，輕撕下一啖，入口嘅係油脂嘅濃香，但又唔會過於肥膩，仲有洋蔥帶嚟嘅辛辣味，更加抹除咗我食羊架嘅罪惡感😌搞到我一啖又一啖，唔使好耐時間，就一個人ko嗮成道菜了。❤️