允升甜品

营业中

休息中

香港離島多，而每個離島都會有佢著名既食肆。就例如入到長洲，就必須要食允升甜品既糯米糍，否則唔好同人講入過黎！允升糯米糍其實唔止有芒果味既，仲有我好鍾意既榴槤味，不過後者要睇季節，過左就無得食架啦。而芒果糯米糍就一年四季都有，size勁巨型，成隻手掌心咁大，係我食過最大粒既。一切開，係好甜好熟既芒果，出面就係勁軟熟煙韌既糯米皮，兩者配合得天衣無縫，真係勁正！如果要堂食，齋食糯米糍係唔得既，必須要叫多最少一種甜品。既然呢度既芒果咁出色，就叫多碗芒果涼粉啦，果然都無令我失望，芒果香甜，涼粉夠爽，好味！而家周街都話係長洲糯米糍，但我買過根本完全唔係果回事，芒果肉唔甜又唔大粒，而且仲濕立立，糯米皮都穿埋，根本就唔得。要食最好味既長洲糯米糍，都係去番允升食啦。