今次第一次黎，一於乜都叫吓，食餐勁嘅。
開爐之前，服務員先加少少泡菜落烤爐嘅一邊，之後加蛋汁。
另一爐邊就加碎芝士同粟米。等個爐燒到咁上下就食得。粟米芝士已經夠特別，而泡菜蛋燒得好乾身，令個蛋外皮有少少脆，味道就帶微微泡菜味，我第一次食，好新奇，創意十足！
服務員之後就上可以無限加添嘅辣泡菜，芽菜，甜漬柚子皮青瓜，甜漬白蘿蔔，
仲有胡麻醬新鮮沙律菜同生菜包。
泡菜質素唔錯，我哋特別鍾意佢哋味道唔會過鹹。食完第一轉，服務員仲主動幫我哋加添。
服務員亦同時上埋醬汁三寶，分別係甜燒肉汁，鹽同麵豉醬。
特選黑毛和牛上貝身肉 $198 另加一
特選黑毛和牛上貝身肉一客6片，油花好靚，肉質好嫩，味道方面點醬汁食會好食啲。伴碟有兩塊蘋果同一舊大蔥。
豪快濟州黑毛豬拼盤 $312 另加一
豪快濟州黑毛豬拼盤有3款豬肉，包括五花肉3厚片，豬梅肉4片，同醬油豬肉12舊左右。伴碟有兩片蘋果，一舊大蔥同一舊菇。
豬梅肉個樣好靚，肉汁超豐富，豬味又濃，正。
醬油豬肉醃好左，味道甜甜哋幾好食。質感完全唔韌，算好嫩。用生菜包住食正。
五花肉上面灑上白芝麻粒，都係醃好左醬油味，味道甜甜哋，質感好好，塊皮連脂肪好彈牙，用生菜包住食好夾。
濟州豪快黑毛豬五花肉 $168 另加一
濟州豪快黑毛豬五花肉一大條厚切，我哋剪開左兩塊先燒，服務員話建議分開半邊燒完一面先一面，因為豬油多會搶火。五花肉肥瘦相間，食落超彈牙，啖啖爽脆而豬味香濃。味道上係冇醃到，不過都夠味。
一盒芝士生蠔 $88 另加一
一盒芝士生蠔一客6份，每隻生蠔下面都有好多碎芝士，上面再灑上香草。生蠔唔細隻，好多汁又重蠔味，芝士勁拉絲，加埋啲蠔汁，好邪惡，但係唔捨得唔清哂佢。
人蔘雞湯 $188 另加一
人蔘雞湯超大鍋，服務員另外放張枱仔喺我哋隔離唔洗驚淥親。個雞湯好清，味道鹹度適中，帶微微甘味，除左全雞同唔少蔘仔，仲有栗子，蒜子，連核紅棗，最後上面灑上蔥。隻雞大過一隻春雞，煲到稔哂，肉質超嫩口，入面釀有黏口米飯，米味融入雞肉當中，好味。服務員仲幫我哋分好兩碗俾我哋食頭轉，成鍋應該最少分到4碗。
另外，叫左兩杯飲品。
柚子青檸梳打 $32 另加一 （左）
開頭飲就主要係梳打味，之後越飲越濃柚子同青檸味，絕對唔過甜，好飲。
濟州特飲 $32 另加一 （右）
濟州特飲即係西柚加綠茶，入面仲有一片橙。綠茶味好濃，啖啖都有柚子肉，唔會過甜，正。
總括而言，今餐食物好好，個人覺得豪快濟州黑毛豬肉最好食，而食物都好有特色，燒爐火力夠猛。服務員服務態度好好，座位舒適，唔怪得星期三晚都全場滿座。
