野郎Stone (已結業)

今次黎試吓尖沙咀分店，同樣都係有得揀150,200,300g嘅肉，加$30就可以有套餐，一個沙律，一個湯，一罐汽水，一個薯蓉/飯/意粉。晚市幾乎個個都係叫套餐㗎啦，因為好抵食，飯、湯、沙律都係可以無限添食嘅，一定夠飽。而我今次就揀咗薯蓉因為怕食得太飽。石板方面溫度係比較熱嘅，好貼心地有一張紙巾蓋住，等客人冇咁容易彈親。主角當然就係塊牛扒啦，呢隻係150g嘅牛翼板，絕對足磅，一般食量嘅人已經夠食。切開等大家睇吓中間有幾生，自己決定要煮幾熟。今次呢塊牛翼板瘦肉比較多，口感紮實不油膩，味道似西冷牛扒但質地比較淰身，口感較嫩滑，其他牛扒店好少食到呢一種肉。之前喺其他分店食嘅時候，有自助嘅調味料同埋黑椒比你自己調教口味，呢間分店就已經由店長幫你調校好，重口味嘅朋友就可以問佢額外拎調味料。