俺之沾麵專門店 (已結業)

聖誕假期柑太要求我帶佢去工展會，出發前先到俺之沾麵一試佢地好出名既沾麵。香港既沾麵，已食過唔少，水準仍難與日本並肩，不過食過呢間俺之沾麵後，真係令我改觀。小店真係好小，廿個位，仲要出面排左七八人係度等，幸好等到即將入座前，店員會出來問我地點乜野麵，減少入座後等上麵既時間。柑太叫左白湯沾麵(傳統口味)，我就叫左黑湯(黑蒜味)，肉方面，最多可以叫三片，於是我點了梅肉，柑太要腩肉。黑湯沾麵，出場發覺個湯好似膠著左，細細地一試，發覺很濃烈既黑蒜豬骨湯味直衝而至。湯底非常熱，而麵條本身非常索湯，本身做得煙韌彈牙，梅肉叉燒嫩滑多汁。傳統豬骨湯，湯底無黑蒜襯托，但本身濃厚的豬骨味一喝已經感到全身發滾，腩肉非常好味，難得的出色佳作。呢間沾麵出品已經很接近日本的一流沾麵，我們二人吃光沾麵後，柑太已經很飽而沒有再加湯混和沾麵湯底，我加湯後，喝了一半，亦已經感到很飽，他們的鰹魚湯做得很出色，混和黑蒜湯後，喝下去好似喝老火湯一般美味。