La Famille (已搬遷) 新店位置

不嬲好鍾意食La famille嘅戚風蛋糕，呢日經過海港城店，難得見到D款咁齊，索性買咗4件未食過嘅口味返屋企試下！La famille嘅戚風蛋糕真心好食，入口鬆軟有彈性，精髓在於忌廉，質感輕盈不膩，入口有淡淡嘅奶香，食完成個都唔會覺得漏。柚子戚風蛋糕口感輕柔，同時夾咗少少柚子皮，可以食到柚子嘅清甜，忌廉亦添加柚子味道，味道清新。面頭佐以紅莓、藍莓及越橘裝飾，酸甜有致，值得推薦。一見到日本白桃，我已經毫不猶疑鎖定目標！蛋糕嘅桃味比較清雅，不過面頭鋪上的日本白桃肉超甜，配合香滑嘅忌廉，簡簡單單的配搭已經好好食！Mojito味道嘅蛋糕十分少見，所以立即就引起我嘅注意！蛋糕食落有淡淡檸檬薄荷香氣，味道唔算好濃，不過勝咗味道天然唔人工。面頭用三粒青檸馬卡龍做點綴，加上少少酒香嘅忌廉，好特別嘅一款！宇治抹茶味係四款入面我最鐘意嘅，戚風蛋糕本身都用咗宇治抹茶去整，食到抹茶嘅香濃與回甘，面頭嘅抹茶醬更有點睛作用，香滑又濃郁，與蛋糕一齊食，每一口都散發甘香。