六叔燒鵝 (已結業)

今晚去朋友屋企睇波，但因為未食晚飯於是去左附近餐廳醫肚，行行吓見到一間幾乾淨既燒臘舖於是入去試吓。一入到餐廳店員就好有禮貌同埋好有笑容咁招呼我哋入座，仲即刻拎餐牌同我哋介紹，一打開餐牌發覺原來都好價廉物美，於是我同朋友就即刻叫嘢食。我就叫咗一個肥叉燒鵝飯，仲有一個例湯一杯餐飲，好快店員已經將個飯送到我面前，個份量仲非常之多，好好彩仲有燒鵝髀，個飯嘅外貌賣相好好，但味道都係一流，依間燒臘舖嘅燒鵝燒得火喉岩岩好，而且又唔會太乾身，燒鵝皮咬落去仲係脆口，而個肥叉燒真係好正，每一塊叉燒都帶有少少肥膏，而家肉質好滑，加上本身既蜜汁真係高質。而我朋友就叫左一個乳豬四寶飯，我都試左少少，個乳豬皮脆肉滑，四寶仲包括左燒鵝，紅腸同咸蛋，佢嘅紅腸都係一個賣點，食落口好有係啲正宗潮州打令鋪既風味，估唔到呢間燒臘舖每一樣都做得好出色。而且個例湯都好好飲，好有老火湯嘅味道，仲想特別介紹呢間燒臘舖嘅檸茶，好有茶味，如果鍾意飲濃味既紅茶真係要試吓，因為唔係周圍都飲到。我哋兩個人食咁多嘢都係一百幾蚊左右，而且店員都好有禮貌，好親切，個個都好有笑容，食到我都覺得好開心。