餐牌設計非常簡潔，左邊圖畫右邊菜名，食物品種有好多選擇，定價亦唔算太貴，個人覺得算為合理😉
因為我地共有6人，亦抱住希望試多啲菜為首要任務，所以食下叫下總共試左13款食物，聽落係咪有啲誇張，咁咪證明左一個字👉「掂」
🔻小籠包($54)/蟹黃大湯包($40一個)
左邊果款係脆煎灌湯小籠包，底部有啲似日式煎餃子果啲網底咁，但呢個仲做得出色，煎到好薄好脆 ，先食上面已經覺得湯汁飽滿，再成個放入口就會食到個底係幾薄脆感覺，真係好野👏；
而右上就係傳統小籠包，當然一樣湯汁飽滿不用多說；
至於右下嘅蟹黃大湯包，同喺上海食法一樣，會俾條飲管你，先吸啜哂啲汁再食埋個包，多湯汁之餘蟹黃味好香，真係食唔停😂
🔻淮揚五福拼盤
拼盤包括海蜇頭、餚肉、豆腐、薰魚及醉雞，五樣都好食，個人認為最出色係餚肉及薰魚，個醬汁味道非常有水準💪
🔻蓮香蜜餞火方
呢個菜之前喺「香港老飯店」食過，一試難忘，「家上海」個蜜餞加上蓮子確實幾特別，整體做得好唔錯，腐皮薄脆、咸火腿亦算淋，配上蜜汁一齊食非常正😋
🔻上海海參酸辣湯
酸辣味好平衡，唔會偏埋一邊，料亦豐富👍
🔻淮揚韭黃亂兜(鱔)
淨係睇個賣相已經好吸引，炒得好有鑊氣，蒜蓉醬汁加埋黃鱔及韭黃，食落去有嘩一聲感覺😍
🔻紅燒年糕炆黃魚
條黃魚好大條一開二，炸脆後用黎炆年糕，年糕軟淋淋，連埋啲醬汁食熱辣辣好好味😋
🔻百頁結紅燒肉
其實幾個餸個醬汁都好相似，味道非常平衡好味，而豬腩肉亦好入味，不過我個人覺得太淋有啲散，如果實正返啲及用瓦煲仔上，相信會更加出色😉
🔻東坡牛面頰肉
呢個係今晚個集團總廚親自介紹，用慢煮烹調左6個鐘，入口即化，牛味濃香唔起渣，好好好食😍😍😍
🔻上海擔擔麵
好多擔擔麵個湯都係較稠，「家上海」個湯底較稀，辣味同花生麻醬味夾得唔錯，食起上嚟好香口👍
🔻高力豆沙香蕉($60)/豆沙鍋餅($52)
甜品跟上面嘅小食主菜一樣，做得頗有水準，用佢哋黎收尾，成餐飯完全有大滿足感覺👍😃
食埋「家上海」後，基本上1957集團嘅餐廳都試過哂，非常有驚喜及水準，如果唔計新開張6折優惠，正價都係每人$300亦算合理，以後將軍澳又多咗一間飯堂🎉👍😍
