Med Chef (已結業)

今次係跟朋友推薦黎呢間主打有大麻二酚CBD既餐廳到試下，見到而家呢個CBD越黎越流行，連啤酒都有，話係可以令人放鬆不過我都係半信半疑。先講下個環境，一入去就見到好大個燈箱招牌好有特色，燈光更加係以紫藍色既色調，好有特色，比我既感覺係有啲似bar。加埋播緊既音樂，未試到大麻二酚已然覺得環境係幾正同埋好放鬆！咁嗌野食方面，餐廳都幾細心，可以自行選擇唔要CBD或者double portion CBD。我就同朋友叫咗一個份板燒頂級肉眼配阿根廷青醬伴烤菊芋蓉($298)、一份板燒西班牙八爪魚海鮮炒長米飯配秘製醬油汁($238)同一份芒果莎莎吉列蝦墨西哥薄餅($98)。先講下個肉眼，我係要五成熟既，塊肉眼十分juicy同隔離既菊芋蓉亦都好夾。我朋友既海鮮飯就炒得好香口，煮得啱啱好。但最令我驚喜既係個墨西哥薄餅，個皮有脆脆地，口感不錯，佢個醬汁同吉列蝦簡直係絕配。而CBD對我黎講都好有作用，唔知係唔係我既心理作用，個晚真係訓得好好，個人都真係好似放鬆咗。以後絕對會再幫襯，試埋佢其他野食。