澳門翠苑餐廳

营业中

休息中

上開openrice，久聞呢度d咖喱農夫包多人讚，但一直未有一試。呢日終於來到食晚飯。原來呢度咁易搵，就喺正朗豪坊對面，仲有天橋連接，等自已上去過時仲烏下烏下由上海街搭電梯上去添！上到去當然試佢最出名嘅咖喱農夫包啦，今次要左咖喱牛腩，再加杯凍咖啡。另外仲要左個中式套餐「時菜牛肉」添！凍咖啡同農夫包先來。個包好大個，份量好足。杯凍咖啡上面鋪上一層咖啡粉，賣相不錯。呷一啖，味道比一般茶餐廳，甚至好多餐廳的好，咖啡味濃得來夠甜，唔會有苦澀味，正！好味！再試農夫包，揭開個香脆的麵包蓋，點落去隨包附上的半碗咖喱汁裡，果然味道唔錯，咖喱汁雖然唔算香辣，但係都幾好味。再試d牛腩同牛筋，牛腩較為普通，雖然都算腍身，但唔算好好食，不過d牛筋就唔錯，炆得算係幾腍。時菜牛肉同例湯（雪耳木瓜煲瘦肉）跟住送到，一望碟餸，咦！乜唔係芥蘭、菜心甚至生菜嘅？竟然係西芹。又真係少見喎，乜唔係通常都係配雞柳嘅咩？！算啦，繼續試菜，味道正常，不過冇乜特別，反而個湯算係唔錯，無乜味精味。埋單一百蚊唔使，都算幾相宜啦！為左杯甚有水準的凍咖啡同今次冇食嘅咖喱雞，下次都會再來嘅。