三喜餐飲小廚鑊氣小炒雞煲火鍋 (已結業)

同媽媽去完佐敦shopping，天氣凍一凍，好想打邊爐。行入後街中，見到有間食店個名好長好長好長，幾過癮埋去望望有咩食。媽媽見到羊腩煲，雙目發亮，就呢間啦！店內唔算華麗，無咩特別裝修格調，傳統小菜小店模樣，但價錢十分親民。羊腩煲配生菜只是$268。其他火鍋生料價錢亦相宜。我地點了一個羊腩煲，加鳥冬。套餐十分大份，有睇頭，睇到已經流口水。好肚餓又要等水滾，媽媽提議點多個涼瓜蒼魚頂頂肚。蒼魚預先煎香再炆，魚肉保持到嫩滑，表皮有少少脆。涼瓜味甘且濃，味道入哂蒼魚，不錯。羊腩煲終於滾起，香氣撲鼻。羊肉炆到軟滑，十分入味，充斥各式香料的味道，又無蓋過羊肉本身的肉香。另一亮點是冬菇，十分大件厚實，吸收了所有醬汁的精華。呢個羊腩煲十分足料，煲底大而豐富，羊肉食極都有，愈食愈熱，令人完美忘了街外的寒流。熱辣辣的晚上，暖到回家，每人二百。舊區小店，沒有輝煌裝修，但有貼地價格。