哈利酒吧 (已結業)

瀟灑Uncle有要事跟細姪商討，為善用細佬午飯僅有o既短短一小時，所以就相約於鄰近o既利景酒店見面，並揀於一樓o既「哈利酒吧」食便當做午餐。酒吧o既厚墊梳化都幾舒服。雖然午市並不旺場，但服務生卻極之忙碌，二人好難先搵到人落單。各自點好便當，姐姐仔先送上彩色o既卡通地圖餐墊及餐具。天婦羅蝦冷麵（$85）：四旬期內o既週五小肥唔食肉，所以就點咗個「天婦羅蝦冷麵」便當。碗暖暖o既麵豉湯可以話係成個餐最美味o既部份，但其實只屬普通貨色而已。兩款刺身當中三文魚還可以，但白色嗰件白身魚就只有一大陣雪味，上枱時亦未完全溶解，都幾恐怖吓！一樣為冰凍o既八爪魚起碼質感滑溜，味道甜濃，食落冇刺身咁反感囉。天婦羅蝦外表金黃乾身，可惜炸蝦唔夠熱辣鬆爽，層偏硬o既炸皮唔夠輕巧。便當內最失色就係個冷麵，咬落又嚡又梅，酸酸怪怪，講真都有啲懷疑會唔會係假麵架。甜品蛋糕仔偏嚡同乾，外觀跟味道均不甚吸引。因深知飲食業市道唔算好，人家開店都係為糊口，XO仔近年都少咗寫負評，長輩請食飯時，更加會額外客氣手鬆啲。今次瀟灑Uncle請去「哈利酒吧」食晏，雖則話係酒店餐廳，但服務及食物質素同樣驚嚇，中午時份可以如此冷清實不無道理。