博洛尼亞 (已結業)

早前，每個禮拜日都會慣性幫襯一下Bo-Lo'GNE 買番個麵包食吓，其實唔係覺得佢特別好食，而係貪佢位置夠方便，而且感覺企理、衞生。但自從有一日，發現佢D麵包價錢，突然唔合理咁瘋狂颷升，就無再幫襯。我諗其他人都感覺得到，因為行過嘅時候，發現舖裡面場面冷清，而店家屬於企理一族，所以想揾隻烏蠅拍吓都難。直至上個禮拜路過，發現佢點解突然多咗咁多人，就入去睇吓，原來店家出咗辣招救市，推出咗好多新口味嘅麵包，而且價錢都幾抵食。作為一個精明嘅消費者，當然即時買番隻食吓。簡咗 “ 照燒漢堡扒雞蛋包＂個樣都幾吸引，包身灑滿芝麻，饀料都幾足，隻太陽蛋爆晒出離，仲有生菜，漢堡扒肉質都算鬆軟，以28蚊買倒，都算係唔錯，但食完之後，自己短期內都唔會再食，因為食完覺得好飽滯，可能食漢堡包都係要熱辣辣好D，冷漢堡都係制唔過。