居食屋「和民」 (已結業)

上星期去APM，見都係六點鬆少少，和民唔使排隊，所以三個人就去食。我地柯打左五樣野，分別係明太子年糕燒餅、炸章魚餅、芝士菠菜豆腐、鐵鍋庵列飯、牛油焗帶子。最先來到係焗帶子，一碟有六隻，味道都好香好唔錯；之後到明太子年糕燒餅，係該晚既特選menu入面搵到，果然係幾好，年糕加強左成個餅質感，加上入面餡料好多好實淨，唔會「散收收」，份量亦唔太少。之後就到鐵鍋庵列飯，呢樣就差少少喇，雖然配左牛肉汁，味係好濃，但係飯就略油同硬，而且蛋面唔夠滑。至於芝士菠菜豆腐，唔多得，芝士味就好夠，但係成兜都多油，食落感覺麻麻。而個炸章魚餅，冇乜特別，同一般小食舖既分別唔大，而且仲比較咸！除左呢幾樣之外，我地亦要左個叉燒拉麵，係用面豉湯底，麵質較其他拉麵店粗少少，不過口感不俗，然而湯就比較咸一點。最後，我地亦有食甜品，就係蕃薯雪糕（幾好，香口又唔太甜），$10一杯OK呀！不過有一樣野，就係去食野要帶多件衫，因為冷氣都幾凍下，短袖衫頂唔順！