椰香咖央多士
多士即叫即製，厚度切得適中，烘得香脆。搽上足夠綿滑嘅咖央醬，每啖都食到椰香同班蘭香，內餡甜而不膩。
百吉爹肉骨茶大雜錦
有齊5款肉類，棒棒骨肉質幾淋；豬手帶皮，筋位口感爽脆富骨膠原；三層肉食落較鬆化帶油香，已經相對較瘦；豬肚好新鮮，食落爽口彈牙；雞腳冇煲到軟爛。將辣椒碎、蒜蓉、黑豉油同頭抽拌勻後，用嚟配肉食更惹味。
底下加咗豆卜同金菇，呢款仲送油炸鬼同響鈴，好可惜係都唔脆。呢鍋湯冇原裝肉骨茶咁重藥材味，多咗一份肉嘅甜味，味道比較易接受。
無限添飲肉骨茶
肉骨茶有20款藥材煲足兩個多小時，其中當歸味最濃烈，湯微暖唔算太熱，充滿藥材香，茶底濃冇苦澀味反而有回甘，飲落香醇順喉。
檳城福建蝦麵
湯底十分之濃郁充滿住蝦膏嘅味道 ，油麵有咬口同湯底一齊食，味道真係好夾。
