雖然門口寫只招待會員，但我地由訂座到埋單都無叫我地入會，都係去到見門口個牌先知，如果唔放心嘅可以訂枱時問吓🤭 另外，提提大家，呢度只收現金㗎！💵
嚟呢度個個都係食同一個十道菜加甜品嘅餐，佢係私房菜所以係無餐牌嘅，不過佢每上一道菜都會講個菜名，慎防大家唔知食緊乜。我見我部分菜式係同各位食評唔同，可能餐廳耐唔耐就會換款式。🧐
❤️ 小樹耳海山湖千色拼盤
中間好似撈起嘅有青瓜絲，柚子，粉皮，木耳，珊瑚草，襯返佢地好香嘅麻油醬汁，食落好爽口開胃。而壽司卷，素燻蹄同皮蛋都唔錯！呢道係我嘅最愛！
好食度：⭐️⭐️⭐️✨ (3.5/5)
❤️ 南瓜濃湯素餃
南瓜湯唔夠濃味😕我鍾意食西式嘅南瓜湯多啲，素餃皮算薄，味道正常。
好食度：⭐️⭐️✨ (2.5/5)
❤️ 紫薯脆酥球
外脆內腍，唔油身，但略嫌紫薯味唔夠濃。
好食度：⭐️⭐️✨ (2.5/5)
❤️ 照燒釀茄子
望落去好似麻麻，但食落都唔錯👀 中間嗰粒驟眼睇好似帶子。黑黑哋咁應該係用咗調味料去煎，但茄子係會有少少吸油。
好食度：⭐️⭐️⭐️ (3/5)
❤️ 芝士焗菜菌批
個批皮有啲似食緊厚身餅乾，比較硬，個感覺令我諗番家政堂整嘅批😂
好食度：⭐️✨ (1.5/5)
❤️ 冬瓜髮菜瑤柱圃
呢道清清哋剛好去咗之前幾道菜嘅油膩感，冬瓜夠腍身，味道正常。
好食度：⭐️⭐️⭐️ (3/5)
❤️ 粟米猴頭菇粟子湯
我都好鍾意飲湯嘅，但呢碗飲時未能令我留下印象。
好食度：⭐️⭐️✨ (2.5/5)
❤️ 鮮果百匯配有營藜麥飯
細食嘅我食到呢度已經飽咗，加上我都幾抗拒煮熱嘅生果去當餸食，所以無試到😬
好食度：唔評價
❤️ 椰香雜菜咖哩配黃油法包
魚蛋好有真魚蛋口感，牛腩有一秒都覺得似，但始終係麵筋。呢度咖哩係唔辣，配埋個法包，正呀！
好食度：⭐️⭐️⭐️ (3/5)
❤️ 香菇扒菜苗
正正常常。
好食度：⭐️⭐️⭐️ (3/5)
❤️ 圓肉杞子桂花糕
桂花糕好香杞子桂花味！口感Q彈！😋 感覺魚膠粉比出面落嘅多，但原來咁樣食落都唔錯架喎！
好食度：⭐️⭐️⭐️✨ (3.5/5)
❤️ 鮮磨香滑核桃露
好香核桃味！好真材實料！我就算食到好飽都食得哂一碗！
好食度：⭐️⭐️⭐️✨ (3.5/5)
餐廳推薦度：⭐️⭐️✨ (2.5/5)
同我兩年前嚟有點比下去，今次食無一道菜令我覺得驚艷，食完都無令我覺得回味，每一道都有種到喉唔到肺嘅感覺，不過耐唔耐食餐素都唔錯嘅。
