影片
更多
2012-04-22
2184 浏览
大家好! o係上一篇食評裡面, 我介紹o左幾款Branto o既地道印式街頭小食. 而今次, 我就會為大家介紹佢地o既印度素食菜式.o係佢地o既菜牌上, 留意到佢地o既主菜係以旁遮普邦 (Punjab) o既菜式做主打 (見下圖):旁遮普菜係北印度菜之中o既主要菜系之一, 特色係運用唔少奶類產品例如乳酪、印式芝士、牛奶等o係各類菜式裡面, 令菜式擁有濃滑o既口味同質感, 相當之適合香港人所喜愛o既creamy 口味. 今晚我揀o左三個好有特色o既旁遮普/北印度菜以饕口福. 分別係「九樣咖哩什菜」 , 「印度芝士拌響香料」, 同埋 「北印度黃飯」(見下圖):主菜上檯之前, 呢度先會o黎一盤 “調味龍門陣”(見下圖):俾食客o係食主菜時作佐膳之用. 值得為大家逐一介紹:印式醃菜 (Indian Pickle; 見上圖) - 係用未熟o既芒果, 青檸, 紅蘿蔔, 辣椒等加入醬料同芥子油醃製. 呢度o的印式醃菜鹹味同酸味都相當適中, 而且又夠辣, 食起o黎開胃醒神, 味道比起灣仔「咖哩煲」o個o的鹹到飛起o既醃菜高出好多皮, 可以話係我食過咁多次印式醃菜之中, 做得最好o既一間! 乳酪薄荷醬
o係佢地o既菜牌上, 留意到佢地o既主菜係以旁遮普邦 (Punjab) o既菜式做主打 (見下圖):
旁遮普菜係北印度菜之中o既主要菜系之一, 特色係運用唔少奶類產品例如乳酪、印式芝士、牛奶等o係各類菜式裡面, 令菜式擁有濃滑o既口味同質感, 相當之適合香港人所喜愛o既creamy 口味. 今晚我揀o左三個好有特色o既旁遮普/北印度菜以饕口福. 分別係「九樣咖哩什菜」 , 「印度芝士拌響香料」, 同埋 「北印度黃飯」(見下圖):
主菜上檯之前, 呢度先會o黎一盤 “調味龍門陣”(見下圖):
俾食客o係食主菜時作佐膳之用. 值得為大家逐一介紹:
印式醃菜 (Indian Pickle; 見上圖) - 係用未熟o既芒果, 青檸, 紅蘿蔔, 辣椒等加入醬料同芥子油醃製. 呢度o的印式醃菜鹹味同酸味都相當適中, 而且又夠辣, 食起o黎開胃醒神, 味道比起灣仔「咖哩煲」o個o的鹹到飛起o既醃菜高出好多皮, 可以話係我食過咁多次印式醃菜之中, 做得最好o既一間! 乳酪薄荷醬 (Mint Raita) - 薄荷汁同香料加入乳酪裡面打成o既點醬, 深綠o既薄荷色好搶眼. 比起其他印度餐館o既薄荷醬, 呢度o既無咁鹹, 香料味道含蓄, 乳酪濃淡適中, 用佢o黎點o野食唔會喧賓奪主, 好o岩我口味.
羅望子甜醬 (Tamarind Chutney; 見上圖) - 呢度o既chutney, 羅望子o既酸味適可而止, 又唔會過份甜耶耶, 用o黎點炸麵包或其他小食相當一流.
生洋蔥片同檸檬 - 呢度o既生洋蔥好大片, 檸檬亦一樣好大舊, 份量十足. 千祈咪以為就咁食佢地會好難食, 當你食到o的辣o野要即時解辣, 小小地o既生洋蔥就係你o既救星, 而榨些少檸檬汁會為濃味o既菜式帶o黎驚喜, 呢點可謂對食客照顧週到. 加分!
主菜終於上檯. 第一道菜係Navratan Korma 「九樣咖哩什菜」(見上圖), 叫佢做 “白咖哩什菜” 會更合適. 顧名思義, 裡面的確有9種蔬果烹製, 包括西蘭花、椰菜花、粟米仔、紅蘿蔔、青椒、豆角、腰果、青豆同菠蘿, 絕不欺場. 我最欣賞o既係佢個白咖哩汁, 裡面加有磨成槳o既腰果, creamy 得o黎食到輕微o既香料味, 濃以不辣. 什菜無話煮得過火, 脆嫩適中. 呢味菜做出傳統Korma o既精髓, 既濃郁又清淡. 滿分!
第二道菜係Paneer Bhurji「印度芝士拌響香料」(見上圖), 即係 “印式炒芝士”. 之前我o係 Sharmaji o既食評中有介紹過, Bhurji 即係印式炒蛋, 而 Paneer Bhurji 係以印式芝士 (paneer) 代替雞蛋, 加入什菜同香料落鑊快炒而成. 相比起 Sharmaji 炒芝士o既傳統街頭粗豪氣慨, Branto o既炒芝士就顯得相當幼細, 每種材料包括paneer、蕃茄、洋蔥、青椒等都切成一絲絲, 入口相當幼滑, 同中式炒蛋有異曲同工之妙! 我覺得呢度同Sharmaji o既炒芝士都各有特色, 用o黎撈飯或者夾麵包都一樣咁好食!
第三道菜, 亦係今晚呢餐o既靈魂, 就係 Hyderabadi Pulao 「北印度黃飯」(見上圖). 呢個譯名其實有誤, 因為呢道菜原自印度東南部o既大成市海得拉巴, 同北印度可謂南轅北轍! 上檯時, 放o係飯頂o個兩塊炸薄脆 (Papadum) 非常吸引, 即刻囉o黎食: 新鮮炸起, 好香好薄好脆, 最好食o既炸薄脆, 莫過於此!
講到個飯, Branto o既印度飯煮得出色, 一粒粒唔會癡埋哂, 所以炒出o黎精盈通透, 材料有西蘭花、紅蘿蔔、豆角、腰果、青豆、印式芝士同辣椒乾, 份量十足. 食落口感到矜貴之餘, 仲食到o的飯滲有大茴香o個份獨有o既香噴噴味道. o個種色、香、味俱全o既感覺真係令我難忘! Perfect!
至於跟飯上o既乳酪 (見上圖) 同樣值得一讚. 佢好滑好厚身, 冇乜酸味, 淨食或撈飯同樣合適. 我用佢o黎餐後消滯, 一流! 總結: 呢三味小菜同佢地o的街頭小食一樣咁高水準, 同樣足夠兩人份, 埋單亦只係HK$176免加一. 綜合兩篇食評, 我覺得 Branto 不論係小食定係主菜, 都同樣做得咁出色, 價錢亦算公道, 係鍾意食印式素食朋友o既必然首選, 即使夜晚要等位, 都係值得o既.
题外话/补充资料：
Branto o既 menu, 有一張過雙面, 中英對照o既純文字菜牌, 亦都有為方便本地食客同外地遊客而設o既彩色相片菜譜. 遇到文字菜牌有唔明o既地方, 睇住o的相黎揀就無走雞. 仲有唔明? 問o的伙記都無問題.
(以上食记乃用户个人意见 , 并不代表OpenRice之观点。)
张贴
